മംഗളൂരുവിൽ ഇന്‍സ്റ്റഗ്രാമിലൂടെ പരിചയപ്പെട്ട പതിമൂന്നുകാരിയെ ലൈംഗികമായി പീഡിപ്പിച്ചു; ബസ് ഡ്രൈവര്‍ക്ക് 20 വര്‍ഷം തടവ്
മംഗളൂരു: ഇന്‍സ്റ്റഗ്രാമിലൂടെ പരിചയപ്പെട്ട പതിമൂന്നുകാരിയെ ലൈംഗികമായി പീഡിപ്പിച്ച കേസില്‍ പ്രതിയായ ബസ് ഡ്രൈവറെ കോടതി 20 വര്‍ഷം തടവിന് ശിക്ഷിച്ചു. ബസ് ഡ്രൈവറും കാവൂരിനടുത്ത് മരക്കടയില്‍ താമസക്കാരനുമായ ദയാനന്ദ ധനന്നാവറെ(30)യാണ് മംഗളൂരു അഡീഷണല്‍ സെഷന്‍സ് (പോക്‌സോ) കോടതി ശിക്ഷിച്ചത്. ഇന്‍സ്റ്റഗ്രാമിലൂടെയാണ് ദയാനന്ദ പതിമൂന്നുകാരിയായ പെണ്‍കുട്ടിയുമായി പരിചയത്തിലായത്. 2022 ജനുവരി 27ന് ഔട്ടിങ്ങിനായി തന്നോടൊപ്പം വരാന്‍ ദയാനന്ദ പെണ്‍കുട്ടിയോട് ആവശ്യപ്പെട്ടു. എന്നാല്‍ പെണ്‍കുട്ടി ഇതിന് തയ്യാറായില്ല. ജനുവരി 28ന് പെണ്‍കുട്ടിയെ ഇയാള്‍ നിര്‍ബന്ധിച്ച് ഓട്ടോറിക്ഷയില്‍ കയറ്റി ഹമ്പന്‍കട്ടയിലെ ലോഡ്ജിലേക്ക് കൊണ്ടുപോയി ലൈംഗികമായി പീഡിപ്പിക്കുകയും പിന്നീട് വീട്ടില്‍ ഇറക്കിവിടുകയുമായിരുന്നു. വിവരം മാതാപിതാക്കളോട് പറഞ്ഞാല്‍ കൊന്നുകളയുമെന്ന് ദയാനന്ദ ഭീഷണിപ്പെടുത്തി. എന്നാല്‍ പെണ്‍കുട്ടി ധൈര്യത്തോടെ ഇക്കാര്യം മാതാപിതാക്കളെ അറിയിക്കുകയും അവര്‍ വനിതാ പൊലീസ് സ്റ്റേഷനില്‍ പരാതി നല്‍കുകയും ചെയ്തു. ജസ്റ്റിസ് രാധാകൃഷ്ണ പ്രതി ദയാനന്ദ കുറ്റക്കാരനാണെന്ന് കണ്ടെത്തുകയും 20 വര്‍ഷം തടവിന് ശിക്ഷിക്കുകയും 50,000 രൂപ പിഴ ചുമത്തുകയും ചെയ്തു. പിഴയടച്ചില്ലെങ്കില്‍ നാല് മാസം കൂടി തടവ് അനുഭവിക്കണം. പെണ്‍കുട്ടിക്ക് മൂന്ന് ലക്ഷം രൂപ നഷ്ടപരിഹാരം നല്‍കാനും അതില്‍ ഒരു ലക്ഷം രൂപ വിദ്യാഭ്യാസത്തിനായി ഉടന്‍ അനുവദിക്കാനും ബാക്കി രണ്ട് ലക്ഷം രൂപ ദേശസാല്‍കൃത ബാങ്കില്‍ എഫ്ഡിയില്‍ സൂക്ഷിക്കാനും ജഡ്ജി ഉത്തരവിട്ടു.
